Esta fin de semana puxemos punto e á parte a varios meses de tarefas dedicadas á difusión, organización e produción deste certame, no que a implicación e confianza de Rocío Lizcano, Kiko Fernández Mujico, Toñito de Poi e Xerardo Piñeiro, entre outras persoas, foron fundamentais, por significarse como colaboradores e valedores que apoiaron a AMBAR nesta iniciativa de exitoso resultado. Destacamos nesta edición a gran participación de obras realizadas en talleres audiovisuais de asociacións do terceiro sector, e que problamente determinarán a inclusión dunha nova categoría a concurso para próximas edicións do certame.

A tamén inestimable colaboración do Concello de Boiro, especialmente da xente da concellaría de cultura, foron determinantes para producir un bo certame que culminou cunha cerimonia de premios pública celebrada na casa do Concello Boirense.

Agora, mediante a presente comunicación, informámosvos de que o pasado sábado, día 14 de novembro de 2009, o xurado do certame NADA SOBRE NOS SEN NOS presidido por Toñito de Poi, coa presenza de Rocío Lizcano, Kiko Fernández Mujico, e Xerardo Piñeiro seleccionou como obras premiadas e distinguidas con mención honorífica as seguintes:

-   MELLoR OBRA NA CATEGORÍA DE DOCUMENTAL :

“EL RÍO DE MARCOS” DE CRISTINA ESMERODE, CECILIA TOUCEDA, SONIA MONTES, PAULA COBAS, 10´

-     MELLOr OBRA NA CATEGORÍA DE FICCIÓN :

“ EL ESCONDITE” de JOSÉ MIGUEL ADAMUZ ALCALDE, 4´45´´

-    MENCIOn HONORÍFICA DA ORGANIZACIÓN:

       "ALBUM DE FAMILIA" DE FRANK TORO

-    MENCIOn HONORÍFICA Do xURADO:

“El VUELO DE COCO" DE ANDRÉS ROMÁN NAVAS, 16´16´´

“A NENA QUE TIÑA UNHA SOA ORELLA”, de alVARO LEÓN, 13´

“NOS LLAMABAN LOCOS", de FRANK TORO, 8´

Entre os asistentes ao acto, presentado por Lisardo Calo e Luisa Crujeiras, ambos socios de AMBAR, atopábanse Cristina Esmerode, Sonia Montes, Paula Cobas e Cecilia Touceda, quen recibiron o premio á mellor obra na categoría de documental, e varias entidades do terceiro sector, entre as que se atopaban dous representantes da Asociación Tots Som Santboians, de Barcelona. Así como tamén estiveron presentes directivos de entidades de diversas comarcas de Galicia e asociacións veciñais, empresariais e de amas de casa do Barbanza. Tamén se atopaban distintas autoridades e represantes políticos da comarca.

Aproveitamos a ocasión para agradecer os apoios e confianza recibida para o bo fin desta iniciativa, da que esperamos próximos efectos positivos na comunidade.

 Arranca a 5ª edición do certame de curtametraxes "Nada sobre Nós sen Nós" que promove a Asociación AMBAR dentro das xornadas do audiovisual do concello de Boiro, certame que versa sobre a temática da disCapacidade dende unha visión de dereitos humanos e cidadanía, coa seguinte programación

Programa Certame de Curtametraxes: "Nada Sobre Nós Sen Nós"

- VENRES 6,

18:30 h. na casa de Cultura de Boiro:

Cinefórum: Proxección do documental “Albúm de familia”.

Ó rematar charla coloquio.

- SÁBADO 14,

10:30 h. Casa de Cultura de Boiro. Reunión do Xurado para determinar as obras gañadoras.

19:00 h. Casa Consistorial do Concello de Boiro. Entrega de premios e proxección das obras gañadoras.

- OS DÍAS 6, 7, 13 E 14

Realizarase a proxección continua das obras presentadas no local social de Aturuxo

Asemade informamos a todo o público en xeral que están convidados a asistir a os actos anteriormente relacionados

--Non fai falla recordar que se trata de actos de entrada libre polo que estaremos encantados coa vosa presencia.

AMBAR foi seleccionada para participar no Programa “Socialia Calidade” de Obra Social Caixa Galicia, a través do cal recibirá formación e consultoría, o que lle permitirá mellorar os seus sistemas de xestión e obter os Certificados de Calidade ISO 9001 no ano 2010. AMBAR poderá optar á obtención do selo EFQM de Excelencia co apoio da entidade financeira.

   
Durante máis dun ano AMBAR traballará, xunto co resto de entidades seleccionadas dentro do programa da Obra Social, para mellorar as súas respectivas organizacións, revisando as súas formas de actuación, compartindo boas prácticas e aplicando solucións innovadoras. E todo iso para que as persoas destinatarias das súas accións, reciban mellores atencións e conten con mellores servizos.

 
As entidades sociais que proximamente asinarán un convenio con Caixa Galicia, convértense así nunha referencia para o sector, pola súa capacidade para adaptarse e adiantarse ás novas esixencias sociais e o seu compromiso  por ofrecer o mellor servizo ás persoas para as que traballan. Isto é especialmente relevante no sector social, no que aínda non están moi estendidas as certificacións de calidade, ao contrario do que ocorre no mundo empresarial.
 
O Programa “Socialia Calidade” enmárcase dentro do compromiso de Caixa Galicia coa mellora e o fortalecemento do Terceiro Sector de Acción social. Este ano participan no mesmo 40 Ong das comunidades autónomas de Galicia, Castela León e Valencia.

Xoán Manuel Sande Muñiz, responsable da área de Benestar Social, Políticas de Igualdade de Xénero e Normalización Lingüística da Deputación da Coruña, visitou o pasado venres 9 as instalacións do Centro de Recursos de AMBAR.

Na visita, na que estivo acompañado pola representante provincial Rosana Pérez, e os portavoces locais, Dominga Brión e Manel Casal, recorreron  as distintas dependencias e talleres nos que a diario traballan as persoas que acoden ó centro ocupacional.

A representante de AMBAR, Milagros Rey, aproveitou esta visita do diputado provincial para transmitirlle as necesidades do colectivo para afrontar as futuras liñas de traballo da entidade. 

 

Na mañá de do 24 de xuño, faleceu en accidente de circulación o amigo e colaborador de AMBAR Manuel Lobato.

A súa irreparable perda deixa un baleiro en todas aquelas persoas que tivemos a inmensa sorte de coñecelo e de contaxiarnos do seu entusiasmo e o seu convencimiento de que outra vida é posible para as persoas con diversidade funcional.

Manuel foi un dos fundadores do Foro de Vida Independente en España, unha das persoas máis significadas na loita a prol dos dereitos humanos e un referente en Europa.

A xente de AMBAR desexamos mostrar o noso apoio á súa familia nestes momentos tan duros.

Manolo, seguro que onde esteas seguirás coa túa loita, que é a de todos nós.

Nunca te esqueceremos.

Descansa en paz

O pasado sábado 16 de maio a Escola de Vela para Todos da Asociación AMBAR e o Clube náutico de Riveira, a Escola de Vela Adaptada do Clube Náutico da Coruña e a Asociación GRUMICO celebraron nas instalacións do Clube Náutico de Riveira, a terceira xornada de convivencia na que se deron cita 25 deportistas e adestradores de ámbalas entidades.

Desta volta empregáronse un total de 6 embarcacións accesibles, realizándose varias regatas de adestramento ó longo de todo o día nas clases Access 3.03 e 2.4 mR (Clase Paralímpica), ademáis de completar a xornada coa navegación en raqueiro.

Cos fondos extraordinarios aprobados polo Goberno poderán mellorar a participación social

O pasado 28 de novembro foi aprobado o REAL DECRETO-LEI 9/2008 que ten por obxecto a dotación de dous fondos extraordinarios: un, destinado a promover a realización por parte dos concellos de investimentos creadores de emprego e outro, coa finalidade de levar a cabo actuacións encamiñadas a mellorar a situación de determinados sectores económicos estratéxicos e acometer proxectos con alto impacto na creación de emprego. Poden beneficiarse desta partida orzamentaria concellos, mancomunidades e agrupacións de dúas ou máis concellos.

Partindo desta noticia, a Asociación AMBAR, solicitou a todas as corporacións locais da comarca da Barbanza que destinen parte destes fondos extraordinarios á accesibilidade, á eliminación de barreiras arquitectónicas e á dotación de medios que posibiliten a igualdade de oportunidades das persoas con diversidade funcional. Ademais, recorda que todas as intervencións urbanísticas deben, por lei, contemplar a accesibilidade, polo que hai que extremar o celo para non realizar obras que por non reunir as medidas de accesibilidade deban de repetirse ou modificarse.

A accesibilidade universal é unha condición fundamental para poder garantir a participación na comunidade das persoas con diversidade funcional, tal e como expón a Convención da ONU acerca dos Dereitos das Persoas con Discapacidade, no seu artigo 9: “a fin de que as persoas con discapacidade poidan vivir en forma independente e participar plenamente en todos os aspectos da vida”.

Sendo o 2009 un ano electoral e dado que máis do 70 por cento dos colexios electorais non cumpren as normativas de accesibilidade, AMBAR considera que debe prantexarse en todos os municipios a intervención en edificios dependentes da administración local para facelos accesibles.

Por esta razón e tendo en conta que un dos destinos dos fondos, previstos no propio Real Decreto-Lei (Art. 3, 1, a), 5), é a supresión de barreiras arquitectónicas, recomendamos aos concellos que utilicen estes fondos para garantir a mobilidade e a visibilización das persoas con diversidade funcional como cidadáns de pleno dereito, posibilitando que todas as contornas públicas carezan de barreiras arquitectónicas e avanzando cara ao cumprimento da Convención, en vigor desde o pasado mes de maio.

A iniciativa, coa que colabora a Consellería de Medio Ambiente, será realizada nun primeiro momento en restaurantes.

Ambar ten previsto distribuir por diferentes restaurantes da comarca do Barbanza 50 contedores de 50 litros de capacidade. A entidade encargarase periodicamente da súa recollida, así como tamén da súa entrega a un xestor autorizado de residuos.

Convenio de  colaboración :

Para levar a cabo esta campaña Ambar conta co apoio da Consellería de Medio Ambiente, grazas á sinatura dun convenio de colaboración, a través do cal, a entidade que preside Milagros Rey recibiu a cantidade de 30 mil euros que foron empregados na compra dun vehículo axeitado para o transporte e a recollida do aceite usado. 

Dende Ambar incídese na importancia desta campaña que posibilitará a recuperación deste residuo entre os veciños, ó tempo que se garante o seu correcto destino posterior a un xestor autorizado.

Entre os obxectivos da entidade con esta campaña tamén figura o fomento do emprego entre as persoas con algún tipo de diversidade funcional, especialmente os de carácter intelectual, a través das actividades de conservación e protección ambiental.

Campaña de sensibilización :

Ambar prevé ademais desenvolver unha campaña de concienciación en tódolos centros educativos do municipio e así ter un maior achegamento a toda a sociedade.